Arestado ang 35-anyos nga lalaki human masakpi sa buy-bust operation sa kapulisan sa Purok Vicente Fin, Barangay Magsaysay, Polomolok, South Cotabato, pasado alas onse sa kagabhion niadtong nakalabay nga adlaw. Giila sa Polomolok Municipal Police Station ang dinakpan nga si alyas Jude residente sa Purok Oberes, Barangay Magsaysay sa maong lungsod.
Narekober gikan sa suspek ang duha ka pakete sa gituohang shabu nga may gibug-aton nga mokabat sa 0.35 gramos, lakip ang plastic sachet. Nasakmit usab ang 500 pesos nga gigamit isip buy-bust money ug usa ka pula ug itom nga Suzuki Raider 150 nga adunay plakang 959MVP. Gipahigayon ang operasyon sa koordinasyon sa Philippine Drug Enforcement Agency o PDEA Region 12.
Samtang giandam na sa kapulisan ang kasong paglapas sa Sections 5 ug 11, Article II sa Republic Act 9165 o Comprehensive Dangerous Drugs Act of 2002 batok sa dinakpan.










