Patay ang magtiayon human gipusil sa wala mailhing mga suspetsado samtang nagsakay sa ilang motorsiklo pauli sa ilang pinuy-anan sa Barangay Panubigan, Pitogo, Zamboanga del Sur, kagabii, Nobyembre 10, 2026. Ang mga biktima mao ang 61-anyos nga lalaki nga miyembro sa Bantay Dagat ug ang iyang 62-anyos nga asawa, susamang mga residente sa maong lungsod.
Base sa inisyal nga imbestigasyon sa Pitogo Municipal Police Station, nahitabo ang pagpamusil pasado alas 7:40 sa gabii, samtang nagbiyahe ang magtiayon sakay sa ilang itom ug pula nga Honda XRM 125 nga motorsiklo.
Human sa pagpamusil, daling misibat ang mga suspetsado sakay sa motorsiklo padulong sa Barangay Matin-ao, Pitogo. Gikumpirma usab sa Municipal Health Officer nga namatay na ang magtiayon tungod sa daghang samad pinusilan nga ilang naangkon. Sa pagkakaron, nagpadayon ang follow-up operations sa kapulisan ug Philippine Army aron mailhan ug madakpan ang mga responsable sa krimen.
Photo courtesy: PIO ZSPPO
