Gipahigayon sa City Agriculture Office ang katapusan nga presentasyon sa ilang 2027 Work and Financial Plan (WFP) niadtong Nobyembre 4 hangtod 5, 2026.
Nagkatigum ang mga opisyal ug kawani sa matag seksyon—sama sa Inland Fisheries, Crop Section, ug Project Development—aron idetalye ang mga programa, proyekto, ug pinansyal nga panginahanglan nga gitumong sa pagpalambo sa sektor sa agrikultura alang sa umaabot nga tuig.
Gipadayag ni City Agriculturist Engr. Richard B. Leono ang iyang kalipay human makadawat ang opisina og ₱87 milyon nga pondo ubos sa 20% Development Fund ug MOOE alang sa tuig 2027. Gipatin-aw ni Leono ang kamahinungdanon sa paggamit sa mga digital nga teknolohiya sa pag-monitor ug pagdumala sa mga proyekto, ug gidasig usab niya ang mga personnel nga mag-andam daan sa ilang mga project proposal aron masiguro ang hapsay ug paspas nga pagpatuman sa mga kalihokan sa opisina.
Mitambong usab sa maong kalihokan si City Mayor Jay Warren R. Pabillaran, kinsa gipasiugda nga ang pondo sa dakbayan kinahanglan gayod nga magamit sa sakto ug magbunga og klarong resulta alang sa mga tawo.Dugang pa nga kinahanglang matudloan ang mga mag-uuma sa saktong mindset sa pagnegosyo aron molig-on ang ilang panginabuhian ug magsilbi silang ehemplo sa komunidad, samtang gipasalig usab niya ang iyang walay hunong nga suporta sa tanang inisyatibo sa City Agriculture Office
Photo courtesy: Malaybalay City Agriculture Office
