Pormal nang nanumpa atubangan ni Libungan Mayor Angel Rose “Apol” L. Cuan, CE ang mga bag-o ug mibalik sa katungdanan nga mga opisyal sa munisipyo. Lakip niini ang mibalik nga Indigenous Peoples Mandatory Representative (IPMR) sa Barangay Poblacion, ang bag-ong IPMR sa Barangay Ulamian ug ang bag-ong Sangguniang Kabataan (SK) Chairperson sa Barangay Sinapangan. Gipasiugdahan sa maong panumpa ang ilang responsibilidad nga mag-alagad nga matinud-anon ug adunay malasakit sa ilang tagsa-tagsa ka komunidad.
Mitambong usab sa kalihokan si Municipal IPMR Emerjell Humabad ug Municipal Local Government Operations Officer (MLGOO) Sir Mark Biescas. Gipasiugda sa lokal nga pangagamhanan ang kamahinungdanon sa aktibong partisipasyon sa mga lumadnong komunidad ug kabatan-onan sa pagdumala sa barangay, isip kabahin sa pagpalig-on sa panaghiusa ug patas nga representasyon sa tanang sektor sa Libungan.
Photo courtesy:Mayor Apol Lumanlan- Cuan
