Gipondohan sa Department of Education (DepEd) og kinatibuk-ang ₱99,975,725 nga pondo alang sa pag-ayo ug rekonstruksiyon sa 11 ka pampublikong eskwelahan sa General Santos City nga naapektuhan sa 7.8 magnitude nga linog.
Ang pondo gikan sa Quick Response Fund (QRF) 2026 ubos sa pagpanguna ni Education Secretary Sonny Angara, nga gitumong sa pagpaayo sa mga pasilidad sa eskwelahan nga nadaot tungod sa kusog nga linog.
Base sa listahan sa mga proyekto, mokabat sa 34 ka classroom ang target nga ma-repair ug ma-reconstruct sa nagkadaiyang pampublikong eskwelahan sa siyudad.
Lakip sa mga benepisyaryo ang A. Biscayda Elementary School, Lagao Central Elementary School, J. Daniel Elementary School-Lanton Elementary School Extension, Mabuhay Elementary School, Aspang Elementary School, Batomelong Elementary School, Pedro Acharon Sr. Central Elementary School, Ignacio D. Solis Sr. Elementary School, Bagong Silang Elementary School, Jose R. Lansang Elementary School ug Datu B. Balunto National High School.
Lakip sa mga proyekto ang rekonstruksiyon sa mga nadaot nga bahin sa mga school building ug pag-ayo sa unom ka classroom sa Lagao Central Elementary School.
Matod ni Mayor Lorelie Geronimo Pacquiao, dako nga tabang ang maong pondo aron mahibalik sa maayong kahimtang ang mga pasilidad sa eskwelahan ug masiguro ang kaluwasan sa mga estudyante ug magtutudlo.
Gipasiugda usab sa alkalde ang panginahanglan nga masiguro ang husto nga paggamit sa pondo aron direktang mapahimuslan kini sa mga eskwelahan nga naapektuhan sa linog.
Nagpasalamat usab si Mayor Pacquiao kang DepEd Secretary Sonny Angara ug sa mga taxpayers tungod sa padayong suporta sa pagbangon ug pagpaayo sa mga pasilidad sa edukasyon sa siyudad.
Photo courtesy: Wikimedia commons
