Kapin sa P500,000 nga kantidad sa gituohang mineral ore ang nakumpiska sa mga operatiba atol sa hiniusang operasyon sa Barangay Dulop, Dumingag, Zamboanga del Sur, niadtong nakalabay nga adlaw.
Gipangunahan kini sa LGU-Dumingag Task Force Bantay Kalikasan, Task Force PENRO-Zamboanga del Sur, 902nd RMFB 9, 1st Zamboanga del Sur Provincial Mobile Force Company, ug Dumingag Municipal Police Station, sa koordinasyon sa Mines and Geosciences Bureau (MGB) Region IX.
Karga matud pa ang 300 ka sako sa mineral ore nga may gibug-aton nga 15,000 kilos sa usa ka 10 wheeler truck nga walay legal nga dokumento ug gikaingong gibyaan sa driver.
Ang nakumpiskang sakyanan ug karga kasamtangan nang giturn-over sa Task Force PENRO-Zamboanga del Sur nga gitakda usab nga ibalhin sa MGB-IX alang sa tukmang disposisyon.
Photo courtesy: ZSPPO-PIO
