Gipahigayon na ang groundbreaking ceremony alang sa rehabilitasyon ug pagkonkreto sa Bacalan–Logan–Domandan–Supit–Culasian–Malagandis–New Canaan Farm-to-Market Road sa probinsya sa Zamboanga Sibugay, nga adunay kinatibuk-ang pondo nga 357 milyon, 394 mil ug 752 ka pesos.
Pinaagi sa maong proyekto, gilauman nga mas mapaayo ang koneksiyon sa mga dalan tali sa mga komunidad sa mga lungsod sa Ipil ug Titay, ilabi na sa pagbiyahe sa mga mag-uuma ug pagdala sa ilang mga produktong agrikultural ngadto sa mga merkado.
Gilauman usab nga makatabang kini sa pagpalambo sa panginabuhian sa mga mag-uuma ug pagdasig sa kalihokan sa ekonomiya sa mga komunidad nga maapektuhan sa proyekto.
Ang maong inisyatibo gisuportahan ubos sa pagpangulo ni Gobernador Dr. Ann K. Hofer, uban sa Bise Gobernador Richard “RicRic” Olegario, mga lokal nga lider, Department of Agriculture Region IX pinaagi sa Philippine Rural Development Project o DA-PRDP, World Bank, ug uban pang partner agencies.
Pinaagi sa pagpatuman sa maong proyekto, gilauman nga ang dugay nang gipangandoy nga mas maayong dalan sa mga mag-uuma mahimong realidad ug maghatag og mas dagkong oportunidad alang sa kalamboan sa Zamboanga Sibugay.
