Nagpahigayon og regular nga inspeksyon ang Local Project Monitoring Committee o LPMC sa lokal nga kagamhanan sa Ipil aron mamonitor ang nagpadayon nga rehabilitasyon sa Taway Barangay Multipurpose Building nga adunay pondo nga usa ka milyon ka pesos ubos sa IMPACT 2026 Fund.
Lakip sa mga trabaho nga gihimo ang pag-ayo sa atop ug salog, pagbutang og koral sa palibot sa building, pagpintal, ug pag-instalar ug pag-ayo sa mga pasilidad sa kuryente. Tumong niini nga mapalambo ang kahimtang sa pasilidad aron mas magamit sa mga miting, programa ug uban pang kalihokan sa barangay.
Padayon ang pagmonitor sa LGU Ipil pinaagi sa LPMC aron masiguro nga hapsay ang pagpatuman sa proyekto ug magamit sa hustong katuyoan ang pondo sa gobyerno. Gilauman nga pinaagi sa rehabilitasyon, mahimong mas komportable ug angay nga lugar ang maong building alang sa mga kalihokan ug panginahanglan sa komunidad.
