Gihatod ang mga medical supplies ug importanteng health equipment ngadto sa Barangay Health Station sa Barangay Batu, lungsod sa Siay, Zamboanga Sibugay, aron mapalig-on ang paghatag og serbisyong panglawas sa mga residente.
Nasayran nga ang maong health station dili lamang nagserbisyo sa mga lumulupyo sa Barangay Batu kondili apil usab ang mga residente sa kasikbit nga mga barangay. Tungod niini, importante nga adunay igong medical supplies ug mga kagamitan aron masuportahan ang adlaw-adlaw nga operasyon sa health station.
Pinaagi sa paghatag sa mga batakang panginahanglanon sa panglawas, gilauman nga mas mapadali ang pagresponde sa mga health worker sa mga panginahanglan sa komunidad. Padayon ang pagpaningkamot nga mapaduol ang mga serbisyong panglawas ngadto sa matag komunidad sa Distrito Dos, ilabi na sa mga residente nga nanginahanglan og dali ug kasaligan nga pag-atiman.
