Nasakmit sa hiniusang operasyon sa mga awtoridad ang gidudahang smuggled cigarettes nga nagkantidad og ₱8.5 milyon sa Himamaylan City, Negros Occidental, diin usa ka suspek ang nadakpan niadtong nakalabay nga adlaw.
Gipahigayon sa Regional Intelligence Division sa PRO-NIR, kauban ang Bureau of Customs ug Philippine Army, ang operasyon human mapamatud-an ang impormasyon bahin sa presensya sa maong mga kontrabando.
Narekober ang 8,875 ka reams ug 418 ka pakete sa sigarilyong adunay tatak nga D&B, YS ug Marvels, nga giingong walay tukmang dokumento. Ang nadakpang suspek anaa na sa kustodiya sa kapulisan alang sa dugang imbestigasyon ug hustong legal nga proseso.
