Arestado ang usa ka inahan human kini napalitan og usa ka pakete sa gituohang shabu gamit ang mga markadong salapi sa usa ka poseur buyer atol sa gikasang anti-illegal drug buybust operation sa mga personahe sa Tagum City Police Station alas 11:30 sa gabie Oktubre 14, 2026 sa Prk. Country homes, Brgy. Mankilam Tagum City.
Giila ang suspek sa alyas nga Lab-lab, 37-anyos, wala’y trabaho, buwag sa bana ug adunay tulo ka mga gagmay’ng anak. Lakip sa gisikop ang bisita niining lalaki kinsa giila sa alyas nga Richel, 40-anyos, residente sa Brgy. San Miguel sa nasangpit nga syudad human nakuhaan usab og 14 ka nagkalain-laing gidak-on sa plastic sachets nga adunay sulod sa gituohang shabu nga gibanabanang mokabat sa napulo (10) ka gramo ug nagkantidad og P60,800 base sa Standard Drug Price.
Blanko pa ang maong inahan kung asa niini ibilin ang tulo ka mga anak sanglit wala kini mapamalihugan nga kaparentihan nga mahimong temporaryong guardian unta samtang anaa pa kini sa kustodiya sa kapulisan.
Hinungdan nga gidala na lamang ang tulo ka minor de edad sa estasyon sa kapulisan aron e-turn-over sa WCPD alang sa hustong pag-atiman.
Sa pagkakaron, kasong paglapas sa Republic Act 9165 ang gikatakdang sagubangon sa mga suspek kinsa gipaslak na sa Tagum City custodial facility alang sa tukmang disposayon.
