Gipahigayon sa Philippine Statistics Authority o PSA ang Provincial Product Accounts Dissemination Forum alang sa 2025 economic performance sa probinsya sa Zamboanga del Norte, didto sa ZANECO Building, Central Barangay, Dipolog City, niadtong Oktubre 1, 2026.
Atol sa maong kalihukan, si PSA-RSSO IX Regional Director Mewchun WS. Pamaran mihatag og welcome message pinaagi sa audio-video presentation. Naghatag usab og mensahe si National Statistician and Civil Registrar General–PSA Usec. Claire Dennis S. Mapa, PhD, kabahin sa mga kalambuan ug kalampusan sa ahensya.
Gipresentar ni PSO-ZN Officer-in-Charge, Supervising Statistical Specialist Andres S. Tapales Jr. ang 2025 economic performance sa Zamboanga del Norte. Base sa datos sa PSA, mitubo og 4.10 porsyento ang ekonomiya sa probinsya niadtong 2025, gikan sa 4.09 porsyento niadtong 2024, samtang miabot sa 130.26 bilyon pesos ang GDP sa probinsya.
Pinakapaspas mitubo ang wholesale ug retail trade, lakip ang repair sa motor vehicles ug motorcycles, nga mitubo og 14.7 porsyento. Misunod ang public administration ug defense sa 11.9 porsyento, human health ug social work activities sa 10.9 porsyento, ug education sa 10.1 porsyento.
Apan base sa report, adunay mga sektor nga nakasinati og pagkunhod. Ang agriculture, forestry ug fishing mikunhod og 2 porsyento, samtang ang construction mikunhod og 7.8 porsyento. Sa laing bahin, ang per capita GDP sa probinsya miabot sa 120,709 pesos, o 3.5 porsyentong pagtaas kumpara sa miaging tuig.
Mipaambit usab og report si Provincial Planning and Development Coordinator Augee L. Velasco, EnP, JD, kabahin sa nagkadaiyang kalambuan sa probinsya, nga may kalabotan sa pag-uswag sa ekonomiya ug serbisyo alang sa katawhan.
Gitapos ang maong kalihukan pinaagi sa paghatag og Certificate of Appreciation ngadto sa mga partisipante gikan sa nagkadaiyang lungsod ug mga opisina dinhi sa probinsya, isip pag-ila sa ilang partisipasyon ug suporta sa maong kalihukan.
