Gipagawas balik sa ilang natural pinuy-anan sa Baliguian, Zamboanga del Norte ang usa ka endangered nga South Philippine Hawk-Eagle ug usa ka Philippine long-tailed macaque (unggoy) niadtong nakalabay nga adlaw.
Gipangulohan sa Community Environment and Natural Resources Office o CENRO Liloy ang maong wildlife release, uban sa mga technical personnel ug OIC CENR Officer Maribel G. Acama.
Gipili ang lugar nga angay ug luwas alang sa pagbalik sa duha ka mananap ngadto sa ilang natural nga palibot.
Sa wala pa kini gipagawas, gipailalom una ang duha ka mananap sa health assessment ug hustong handling protocols aron masiguro nga maayo ang ilang kahimtang ug andam na silang mabuhi pag-usab sa kalasangan.
Gipasiugda ni Acama nga kabahin kini sa padayong paningkamot sa DENR sa pagpanalipod ug pagkonserbar sa wildlife. Giawhag usab ang katawhan nga i-report dayon sa CENRO ang mga mananap nga nasamdan, nawala sa ilang habitat o iligal nga pagdakop, ug likayan ang pagdakop ug pagbuhi niini.
Photo Courtesy: DENR Zamboanga Peninsula
