Nasakmit sa kapulisan ang nagkadaiyang mga armas, bala, ug usa ka 40mm grenade cartridge atol sa pagpatuman niini sa search warrant nga miresulta sa pagkasikop sa usa ka lalaki sa Barangay Malhiao, lungsod sa Badian, Cebu, ning probinsya sa Sugbo Oktubre 1, 2026.
Lakip sa mga narekober nga mga butang gikan sa suspek nga si alias Arman, 60 anyos, mao ang usa ka .38 caliber revolver nga walay serial number ug duha ka improvised nga 12-gauge shotgun, uban ang tulo ka buhing bala sa .38 caliber, 11 ka buhing bala sa .45 caliber, ug tulo ka buhing bala sa 12-gauge shotgun.
Nasakmit usab sa kapulisan ang usa ka magazine, usa ka 40mm grenade cartridge, ug usa ka itom nga belt bag. Ang search warrant gi-isyu sa Regional Trial Court Branch 96 sa Barili, Cebu, may kalabotan sa mga kalapasan sa Republic Act No. 10591, o ang Comprehensive Law on Firearms and Ammunition, ug Republic Act No. 9516, mahitungod sa ilegal nga paghupot og mga eksplosibo.
Ang dinakpan kasamtangang anaa sa kustodiya sa Badian MPS, samtang gipasnag-at na ang tukmang mga kaso base sa resulta sa operasyon ug eksaminasyon sa mga nasakmit nga butang.
Photo Courtesy: Cebu Police Provincial Office
