Nadawat sa Taiwan ang unang duha ka F-16V fighter jets nga gihimo sa Estados Unidos, isip kabahin sa pagpalig-on sa kapasidad sa militar sa isla batok sa posibleng pag-atake sa China.
Kabahin ang mga eroplano sa $8b kasabutan alang sa 66 ka F-16V nga giaprobahan atol sa unang termino ni US President Donald Trump ug gikatakdang ipadala karong tuiga.
Ang duha ka eroplano nga gihimo sa Lockheed Martin mitugpa sa air force base sa Taitung, sa habagatang-sidlakang bahin sa Taiwan. Gipaabot unta ang ilang pag-abot sayo niadtong Septiyembre human sa mga hunonganan alang sa pag-refuel sa Hawaii ug Guam, apan nalangay ang delivery.
Matud sa mga eksperto, ang F-16V usa ka fourth-generation multi-role fighter nga mas abante kun itandi sa daang F-16 A/B sa Taiwan. Nasangkapan kini og mas modernong combat, detection ug engine capabilities nga makatabang sa pagpalig-on sa depensa sa Taiwan.
Samtang, nag-atubang gihapon og delay ang paghatod sa ubang armas ngadto sa Taiwan. Matud ni Defence Minister Wellington Koo, lisod nga mahatod ang tanang 66 ka F-16V sulod niining tuiga, bisan pa sa pagpadako sa produksiyon sa Lockheed Martin.
Nagpaabot usab ang Taiwan sa pag-apruba sa laing $14b weapons package gikan sa Estados Unidos, nga gilakip ang Patriot air defence system. Gipahunong pa kini ni Trump, samtang ang mga opisyal nagkonsiderar sa epekto niini sa relasyon sa China ug Taiwan.
Ang China nag-angkon nga kabahin sa ilang teritoryo ang Taiwan ug mihulga nga mogamit og pwersa aron makuha pag-usab ang isla.
Photo Courtesy: Reuters
