Kapin 50 ka Chinese nationals ang gikatahong gihuptan alang sa questioning human nagpahigayon og operasyon ang National Bureau of Investigation o NBI ug Armed Forces of the Philippines o AFP sayo karong adlaw nga Biyernes sa Purok Dos, Barangay Kimos, Siay, Zamboanga Sibugay.
Gisugdan ang operasyon mga alas-3:00 sa kaadlawon sa palibot sa Acacia Mini-Mart, diin gikatahong nagpabilin ang mga Chinese nationals sa duol nga Casa de Coco Pension House.
Narekober sa mga awtoridad ang mga computer, cellular phones ug uban pang mga gamit nga mahimong makatabang sa nagpadayong imbestigasyon.
Gitan-aw usab sa mga awtoridad ang posibleng kalambigitan sa grupo sa POGO-related o uban pang online activities, apan wala pa kini opisyal nga gikumpirma sa bisan unsang ahensya sa gobyerno.
Padayon pa ang verification sa identidad sa mga indibidwal ug sa tinuod nga kinaiya sa ilang mga kalihokan. Samtang, sumala sa mga residente, dugay na nilang namatikdan ang presensya sa mga Chinese nationals sa lugar, apan wala sila’y nahibaloan nga illegal nga kalihokan nga nalambigit sa grupo.
Matod ni Barangay Kimos Punong Barangay Avelino Kimos, nahibalo ang lokal nga mga opisyal nga nagpabilin ang mga langyaw sa pension house, apan ilang nasabtan nga mga bisita lamang kini nga nag-check in.
Nagpadayon ang imbestigasyon sa NBI ug AFP aron matino ang identidad, legal nga kahimtang, ug kalihokan sa mga indibidwal nga naapil sa operasyon.
