Gidakop sa mga kapulisan ang usa ka 55-anyos nga skincare specialist nga giila nga wanted person tungod sa kasong pagpangawat sa Purok Narra, Barangay Sinawilan, Digos City niadtong Miyerkules sa gabii, Setyembre 16, 2026.
Ang nadakpan mao si alyas Gemma, residente sa maong lugar. Sumala sa Digos City Police Station, nadakpan si alyas Gemma pasado alas 8:42 sa gabii atol sa operasyon sa Warrant Tracker Team sa Digos CPS, kauban ang 1st Davao Sur Provincial Mobile Force Company ug DSPPO Tracker Team 1.
Giserbisyuhan sa mga kapulisan si alyas Gemma og warrant of arrest nga may Criminal Case No. 82(2026) alang sa Theft o pagpangawat.
Ang warrant gipirmahan ug gi-isyu niadtong Setyembre 14, 2026 ni Hon. Bambeth Mahal Jambangan Diez, Presiding Judge sa Municipal Trial Court in Cities, 11th Judicial Region, Digos City, Davao del Sur, nga adunay rekomendadong piyansa nga 6,000 pesos.
Girekord usab ang operasyon gamit ang Alternative Recording Device o ARD, subay sa mga lagda sa paggamit sa body-worn cameras. Gipahibalo sa mga kapulisan ang akusado sa iyang constitutional rights ubos sa Miranda Doctrine, lakip ang kinaiya ug hinungdan sa iyang pagdakop, sa pinulongan nga iyang nasabtan.
Human sa pagdakop, gidala siya sa Davao del Sur Provincial Hospital alang sa physical ug medical examination. Sa pagkakaron, anaa na sa kustodiya sa Digos City Police Station si Villanueva alang sa hustong disposisyon.
