Nasakmit sa mga Security Screening Officer o SSO sa Office for Transportation Security o OTS ang usa ka revolver nga gibutang sulod sa carry-on baggage sa usa ka pasahero sa General Santos Airport niadtong Martes, Septiyembre 15.Ang pasahero unta molupad paingon sa Manila pinaagi sa Cebu Pacific Flight 5J 996 via Cebu.
Nasuta ang armas atol sa baggage screening human makadetect si SSO Ella Dane Ireneo, ang X-ray operator, og hulagway nga susama sa usa ka gidili nga butang. Gitawag dayon niini ang atensyon ni baggage inspector SSO Joy Ann Paguntalan, kinsa mihimo og manual inspection sa bag, uban ang presensya sa on-duty personnel sa PNP Aviation Security Group.
Narekober gikan sa bag ang usa ka revolver. Gipangayo sa PNP officer ang lisensya sa pagpanag-iya ug pag-possess sa armas, lakip ang permit sa pag-transport, apan wala kini ikapakita sa pasahero.
Namatikdan usab nga walay serial number ang nasakmit nga armas. Tungod niini, wala tugoti ang pasahero nga makasakay sa iyang flight ug gitugyan ang insidente sa law enforcement authorities alang sa tukmang aksyon.
Gipasalig ni OTS Administrator Usec. Gilberto DC Cruz ang pagpasalamat sa PNP sa ilang paspas nga pagresponde, samtang gipahinumdoman ang mga pasahero nga sundon ang tanang airport security regulations sa pagdala og armas o gun replicas.
Gidugang ni Cruz nga kinahanglan unang masiguro sa mga pasahero ang gikinahanglang mga dokumento ug clearance gikan sa tukmang awtoridad, lakip ang PNP Aviation Security Group, sa dili pa magdala og armas ngadto sa airport.
Photo Courtesy: ots.gov.ph
