Patay ang 53-anyos nga driver sa Kawasaki CT Bajaj motorcycle human nalambigit sa usa ka vehicular accident sa National Road, Purok 3, Barangay Batangan, Valencia City, Bukidnon, niadtong nakalabay nga adlaw. Wala usab nakapakita og driver’s license ang biktima sa gihimong imbestigasyon sa kapulisan.
Base sa imbestigasyon sa Valencia City Police Station, nagbiyahe paingon sa Barangay Batangan ang Bajaj samtang gikan sab sa pikas direksyon ang usa ka wala pa mailhing motorsiklo ug usa ka Honda CFT125MSP. Giingong misulod sa pikas lane ang Bajaj ug hapit ma-side swipe ang wala mailhing motor, apan mipadayon kini ug nabangga ra gihapon sa maong motorsiklo. Natumba ang duha ka motor sa dalan ug gisundan kini sa pagkabangga sa nagsunod nga Honda.
Tungod sa grabeng samad sa lawas, gidala sa tambalanan ang driver sa Bajaj apan gideklarang dead on arrival sa attending physician. Samtang, nasamdan usab ang 42-anyos nga driver sa Honda ug ang 36-anyos niyang backrider, apan nibalibad na sila nga magpaospital. Ang ikaduhang driver nga wala pa mailhi mikalagiw ug misibat gikan sa dapit sa insidente, samtang padayon pa ang imbestigasyon sa kapulisan alang sa dugang detalye sa nahitabo.
Photo Courtesy:Valencia City Police Station
