Nagpadayon ang pag-monitor sa Bureau of Fisheries and Aquatic Resources o BFAR sa Tantanang Bay sa Zamboanga Sibugay human makit-an nga positibo gihapon kini sa paralytic shellfish poison o toxic red tide.
Base sa pinakabag-ong advisory, ang mga shellfish sama sa tahong, talaba ug uban pang kabibe nga makuha gikan sa apektadong katubigan dili pa luwas kan-on tungod sa lebel sa toxin nga milapas sa gitakdang regulatory limit.
Gipahimangnoan ang mga residente, ilabina ang mga mangingisda ug namaligya og seafood, nga likayan una ang pagkuha, pagbaligya ug pagkaon sa shellfish nga gikan sa Tantanang Bay samtang anaa pa ang red tide advisory.
Gipasabot usab nga ang isda, nukos, pasayan ug alimango mahimong kan-on basta presko, hugasan pag-ayo ug tangtangon ang internal organs sama sa hasang ug tinai sa dili pa lutuon.
Padayon ang pagmonitor sa BFAR aron mahibal-an kung kanus-a mahimong ideklarar nga luwas na usab ang Tantanang Bay. Giawhag ang publiko nga mosunod sa opisyal nga advisory aron malikayan ang posibleng pagkahilo tungod sa red tide.
