Nakakuha og upat ka Green Stars ang Cebu City Medical Center (CCMC) human makab-ot ang 91.63% nga Green Viability Assessment (GVA) rating, nga gi-validate sa Department of Health Central Visayas Center for Health Development (DOH 7). Pinaagi niini, nahimong bugtong LGU hospital sa Central Visayas ang CCMC nga nakadawat sa upat ka Green-Star recognition ubos sa GVA.
Gisusi sa GVA ang mga health facility base sa ilang mga paningkamot sa pagpalambo sa green, luwas, malungtaron, ug climate-resilient nga healthcare environment. Ang 91.63% nga rating nagpakita sa padayong pagpauswag sa operasyon ug pasilidad sa CCMC.
Gipasalamatan sa CCMC ang tibuok workforce niini tungod sa ilang dedikasyon, teamwork, ug commitment. Ang upat ka Green Stars usa ka dakong milestone sa padayong paningkamot sa ospital alang sa mas luwas, mas lunhaw, ug mas lig-on nga healthcare system sa Cebu City.
Photo Courtesy: Philippine News Agency
