Narekober sang Joint Police Operatives ang 200 ka reams sang ginasuspetsahan nga smuggled nga sigarilyo sa random checkpoint sa National Road, Barangay Cadiz, Kalamansig, Sultan Kudarat, banda alas 5:30 sang hapon sang September 5, 2026. Ginapatihan nga nagabalor sang ₱171,136 ang mga nakumpiskar nga sigarilyo, lakip ang Cannon Menthol kag Berlin.
Tatlo ka persona ang nadakpan sa operasyon, nga ginkilala sa alias nga “Dats,” 58 anyos, “Boy Tattoo,” 24 anyos, kag “Kabir,” 25 anyos kun sa diin ginapreparar ang pagpasaka sang kaso para sa nasambit nga mga suspek sa paglapas sa Republic Act Number 10863, ukon Customs Modernization and Tariff Act.”
Samtang, isa ka Glock 21 Gen 5 Pistol ang narekober sa plain view sa sulod sang salakyan. Suno sa kapulisan, nagpresentar ang driver sang mga dokumento para sa armas, apang ginkuha ini para sa beripikasyon.
Ang tatlo ka nga mga suspek, mga nakumpiskar nga sigarilyo, armas, kag salakyan gindala sa Kalamansig Municipal Police Station para sa husto nga dokumentasyon kag disposisyon.
Suno Kay Pbgen Alan B. Manibog, Regional Director sang Police Regional Office 12, padayon nga ginapabakod sang kapulisan ang mga operasyon batok smuggling agud mapunggan ang pagpasulod kag pagbiyahe sang mga kontrabando.
Photo Courtesy: PNP Police Regional Office 12
