Gikumpirma sa Department of Transportation (DOTr) ang kapin ₱250 milyong pundo alang sa rehabilitasyon ug pagpaunlad sa General Santos International Airport. Human sa budget hearing, nakigpulong mismo ang mga opisyal kang DOTr Secretary Giovanni Z. Lopez aron masiguro nga magpadayon ang proyekto.
Lakip sa prayoridad ang pagkompleto sa ikaduhang andana sa terminal sa dili pa matapos ang Nobyembre o sa unang semana sa Disyembre, aron maandam kini sa pagdagsa sa mga pasahero panahon sa kapaskuhan. Giplano usab ang pagdugang og bag-ong boarding bridge nga mahimong magserbisyo sa dagkong eroplano sama sa Airbus A330 alang sa mga international flight.
Alang sa kaluwasan sa mga pasahero, ilisan usab ang mga nadaot nga bungbong sa terminal og lig-on nga tempered glass isip proteksyon batok sa linog ug uban pang kalamidad. Padayon ang koordinasyon sa DOTr ug Civil Aviation Authority of the Philippines (CAAP) aron masubay ang pagpatuman sa proyekto hangtod sa hingpit nga mahuman.
Ang pag-ayo ug pagpauswag sa GenSan Airport kabahin sa mas dakong plano nga himoon kini nga world-class nga sentro alang sa negosyo, turismo, logistics ug pamuhunan, nga makatampo sa pag-uswag sa General Santos, South Cotabato ug sa tibuok Region 12.
Photo Courtesy:FB Shirly Bañas
