Giaksyonan sa mga ahensya sa Local Government Unit sa Iligan City sama sa Iligan City Traffic and Parking Management Office, Traffic Enforcement Unit, Iligan City Disaster Risk Reduction and Management Office, ug ang Executive Management Board ang mga reklamo sa mga motorista kabahin sa direksyon ug traffic arrangement sa mga sakyanan nga mobisita sa Mugna 2026.
Sa paghinabi sa Juander Radyo Iligan News Team kang Shelardino M. Capitan Head sa Mugna Committee, nga kapin usa ka bulan nang nag-andam ang mga nagkalain-laing ahensya, apan ilang giila nga adunay mga kakulian sa traffic flow tungod sa limitado nga exit ug gamay nga mga agianan sa maong lugar.
Samtang, sumala kang Ralph Oblenda, hepe sa Iligan City Traffic and Parking Management Office, naghimo na sila og mga adjustment aron masulbad ang problema sa trapiko.
Lakip sa mga kausaban ang mas klarong paghan-ay sa mga agianan kung asa mosulod ug mogawas ang mga sakyanan sa Mugna area, ingon man ang pagpalong sa traffic lights sugod alas singko sa hapon ug mag-assign usab og personnel nga direktang magbantay sa dagan sa trapiko aron malikayan ang paghuot sa mga sakyanan.
Alayon niini, gipahigayon usab ang inspection sa area aron masiguro nga mas hapsay ang traffic flow sa mga mosuroy ug motambong sa Mugna.
Nunot niini, nagpabilin og pahimangno si PLTCOL. Oswaldo Tongson Head sa TEU sa mga drayber nga likayan ang sobra nga pag-inom og alkohol atol sa ilang pagbisita sa Mugna, magmatngon ug magpabiling responsable sa pagdrayb aron malikayan ang disgrasya ug masiguro ang luwas nga pagpauli.
