Nang-apod-apod ang kagamhanan sa Dakbayan sa Sugbo og face masks sa mga estudyante sa Don Vicente Rama Memorial Elementary School kagahapong adlawa, Septiyembre 2, 2026, isip lakang sa pagpanalipod sa mga bata batok sa nagkagrabeng kalidad sa hangin sa Metro Cebu.
Gipangulohan ni Cebu City Mayor Nestor Archival ang pag-apod-apod uban ni City Councilor Dave Tumulak, chairman sa Committee on Disaster Risk Reduction Management, Safety, and Climate Change Adaptation, ug mga personnel sa Cebu City Disaster Risk Reduction and Management Office (CCDRRMO).
Giklasipikar nga “Acutely Unhealthy” ang Air Quality Index (AQI) sa Metro Cebu nga mikabat sa 203, mas taas kun itandi sa lebel nga natala niadtong miaging adlaw. Tungod niini, gipahinumdoman ni Mayor Archival ang mga estudyante nga magsul-ob og face mask kung mogawas aron malikayan ang paglanghap sa dili maayong elemento nga anaa sa hangin.
Gipasabot sa mayor nga posibleng makaapekto sa panglawas, ilabina sa baga, ang mga abog nga madala sa hangin. Busa, iyang giawhag ang mga bata nga tipigan ug gamiton ang mga mask nga ilang nadawat isip proteksyon.
Giawhag usab sa kagamhanan ang mga residente, ilabina ang mga ginikanan ug guardian, nga maghimo sa gikinahanglang pag-amping aron mapanalipdan ang mga bata batok sa dili maayong kalidad sa hangin.Gidasig usab ang publiko nga kanunay nga mosubay sa opisyal nga air quality updates ug mga pahibalo bahin sa angay nga health measures.
Photo courtesy: Cebu City News
