Nagpahimangno ang Provincial Veterinary Office sa Zamboanga Sibugay, sa pagpanguna ni Dr. Efren Davin, ngadto sa tanang hog raisers sa probinsya nga magmatngon batok sa posibleng pagkaylap sa African Swine Fever o ASF, ilabina karon nga adunay mga baboy nga namatay sa pipila ka lugar.
Gidasig ni Dr. Davin ang mga hog raiser nga dili pasagdan ang mga baboy nga adunay mga timailhan sa sakit. Kung adunay kalit nga pagkamatay o daghang baboy nga nagkasakit, kinahanglan dayon kini i-report sa Municipal Agriculture Office o Veterinary Office aron masusi ug matino ang hinungdan.
Gipahinumdoman usab ang mga mag-uuma nga higpit nga sundon ang biosecurity measures. Kinahanglan limpyohan ug i-disinfect kanunay ang kulungan, kontrolon ang mga tawo ug sakyanan nga mosulod sa pigpen, ug likayan ang pagbalhin-balhin sa baboy gikan sa usa ka lugar ngadto sa lain nga walay hustong veterinary clearance. Ang Department of Agriculture ug Bureau of Animal Industry padayon usab sa pagpatuman sa surveillance, movement control ug uban pang mga lakang batok sa ASF.
Gipahimangnoan usab ang publiko nga dili ibaligya, ihawon, ibalhin o ilabay basta-basta ang mga baboy nga nasakit o namatay, tungod kay mahimong makatabang kini sa pagkaylap sa virus. Kinahanglan una nga mokonsulta sa veterinary personnel aron makuha ang hustong instruksyon sa pagdumala ug pag-disinfect sa lugar.
Sa katapusan, panawagan ni Dr. Efren Davin sa tanang hog raiser: “Ayaw hulata nga mokuyanap ang sakit. Kung adunay kalit nga pagkamatay o pagmasakit sa mga baboy, i-report dayon sa inyong lokal nga veterinary office.” Ang sayong pagreport, hustong biosecurity ug kooperasyon sa mga mag-uuma ug awtoridad maoy importante aron maprotektahan ang industriya sa baboy ug panginabuhian sa mga Sibugaynon.
