Dad-on ni General Santos City Councilor Beth Bagonoc sa Sanggunian Panlungsod ang reklamo sa mga lehitimong meat vendor sa pampublikong merkado nga giingong naapektuhan ang ilang halin tungod sa kadaghan sa mga nagbaligya og karne sa mga sidewalk ug daplin sa dalan.
Sumala ni Bagonoc, wala pa pormal nga natuki sa konseho ang maong isyu, apan iyang giplanong ipatawag ang Market Administrator aron hisgutan ang sitwasyon ug mangita og angay nga solusyon.
Gihatagan usab og gibug-aton sa konsehala ang panginahanglan nga mapanalipdan ang mga lehitimong vendor sulod sa merkado nga nagsunod sa mga regulasyon ug regular nga nagbayad sa buhis ug permit fees.
Gipasabot ni Bagonoc nga posible nga temporaryo lamang ang pagbaligya sa ubang meat vendors sa mga dalan samtang nagpadayon ang proseso sa pagbag-o o redevelopment sa pampublikong merkado.
Nanawagan siya sa mga vendor ug sa publiko nga hatagan og pagsabot ang kasamtangang sitwasyon samtang gihimo sa lokal nga panggobyerno ang mga lakang aron matubag ang problema.
Gipasalig ni Bagonoc nga paningkamotan sa konseho ug sa lokal nga panggobyerno nga mapanalipdan ang katungod ug panginabuhian sa mga legal ug lehitimong vendor sa merkado.
