Dakpan sa kapulisan ang 36-anyos nga si alyas Ryan residente sa Purok Tamia 2, Barangay Don Martin Marundan, Mati City, pasado alas 8:10 sa gabii niadtong nakalabay nga adlaw.
Kahibaloan ang dinakpan mao ang responsable sa pagsulay ug lugos sa usa ka menor de edad nga Grade 9 student kagabii didto duol sa Techno Park.
Sumala sa report sa Mati City Police Station, boluntaryong mitahan ang suspek kang Barangay Kagawad Jannel L. Sermonda. Human niini, giadto sa mga pulis ang suspetsado uban sa biktimang babaye ug human makumpirma ang identidad niini dayung gidakop. Gipahibalo usab ang akusado sa iyang mga katungod pinaagi sa pinulongan nga iyang nasabtan.
Atol sa pagpangita nga gihimo human sa lawful arrest, nasakmit gikan sa suspek ang gituohang illegal nga droga o mas nailhang shabu nga gibana banaang mutimbang sa 6.07 gramos ug adunay Standard Drug Price nga ₱41,276. Lakip usab sa nakumpiska ang usa ka sky blue nga face towel ug usa ka green nga disposable lighter.
Ang tanang nakumpiskang mga ebidensya gimarkahan ug giimbentaryo dayun sa lugar sa nahitaboan uban sa mga testigo ug sa suspek mismo. Sa kasamtangan gikustodiya na ang dinakpan sa Mati City Police Station alang sa hustong disposisyon ug mag atubang ug tukmang mga kaso.
Photo Courtesy:Mati CPS
