Gipusil ang magtiayon nga mga mag-uuma sa Purok Sabwag, Barangay Kapatagan, Digos City niadtong Agosto 25, 2026, alas-12:20 sa udto. Patay ang asawa nga si alyas Rosalie, 41 anyos, minyo ug mag-uuma, samtang naluwas ang iyang bana nga si alyas Amor, 40 anyos, nga usa usab ka mag-uuma.
Si Amor padayon nga nagpaalim sa ospital tungod sa samad nga iyang naangkon sa pagpamusil. Ang giingong suspek nga si alyas Sam, usa usab ka mag-uuma ug residente sa maong lugar. Base sa inisyal nga impormasyon, adunay panagbangi tali sa mga hingtungdan nga may kalabotan sa yuta ug mga tanom nga gulay.
Human sa insidente, gilusad dayon sa mga kapulisan ang hot pursuit operation batok sa suspek. Wala pa mag-24 ka oras, alas-10:38 sa buntag sa Agosto 26, malampusong nadakpan si alyas Sam sa mga personnel sa Digos City Police Station nga gipangulohan ni PLTCOL Norman T. Yparraguirre, Chief of Police, uban sa 4th Platoon sa 1st Davao del Sur Provincial Mobile Force Company ug 39th Infantry Battalion, Philippine Army.
Atol sa legal nga pagdakop, gihimo ang pat-down search diin narekober gikan sa suspek ang usa ka .45 caliber pistol nga adunay serial number 416258, lima ka buhing bala ug usa ka fired cartridge case. Gidala ang suspek ug ang mga nakuhang ebidensya ngadto sa Digos City Police Station alang sa tukmang dokumentasyon ug pagproseso sa kaso.
Murder ug frustrated murder ang posibleng atubangon nga mga kaso batok sa suspek, subay sa resulta sa imbestigasyon ug pagtino sa mga awtoridad.Padayon ang imbestigasyon sa kapulisan aron masuta ang tibuok detalye sa pagpamusil.
