Nagpadayon nga nanguna ang Zamboanga del Sur sa tibuok Zamboanga Peninsula sa gidaghanon sa mga mag-uuma nga nagpasiguro sa ilang mga pananom pinaagi sa Philippine Crop Insurance Corporation (PCIC Region 9).
Base sa datos nga gipagawas ni Isagani F. Templanza III, Officer-in-Charge sa MSD, mokabat sa 11,364 ka rice farmers sa Zamboanga del Sur ang nagpasiguro sa ilang pananom nga humay.
Gisundan kini sa Zamboanga del Norte nga adunay 10,078 ka rice farmers, samtang 7,789 ka rice farmers usab sa Zamboanga Sibugay ang nakapasiguro.
Sumala ni Templanza importante kini ilabi na sa mga mag-uuma sa Zamboanga del Sur nga kanunay nag-atubang sa risgo sa bagyo, kusog nga ulan, baha ug uban pang kalamidad nga mahimong makaapekto sa ilang panginabuhian.
Sa pagkakaron, nagpadayon ang pagdasig sa mga mag-uuma sa rehiyon nga magpa-insure aron mapanalipdan ang ilang puhunan ug panginabuhian, ilabina tungod sa nagkadaiyang risgo nga mahimong makaapekto sa produksyon sa agrikultura.
