Nibisita sa Philippine Embassy sa Rome, Italy ang Philippine windsurfing team nga moapil sa 2026 Asian Games sa Nagoya, Japan isip kabahin sa ilang courtesy call kang Consul General Randy Arquiza.
Nanghinaut si Arquiza sa maayong kapalaran sa mga atleta ug siya nag-awhag nga paningkamotan ang pagdaog og Gold samtang nagbansay sila sa Bracciano, Italy isip pagpangandam alang sa Asian Games nga ipahigayon gikan Setyembre 19 hangtod Oktubre 24.
Gidayeg usab niya ang team tungod sa ilang maayong nahimo sa nagkadaiyang international competition diin kini naglakip nila Khian Cuerdo ug Jade Justiniane sa tournament sa Poland, ug ang pag-angkon nila sa mga medalya sa miaging Southeast Asian Games ug Asian Beach Games.
Mipahayag ang mga atleta nga dako ang ilang nakat-unan sa ilang mga kompetisyon sa Spain ug Poland nga ilang magamit sa umaabot nga Asian Games ug Youth Olympic Games.
Lakip sa mga miyembro sa team nga mibisita sa embahada sila Dhenver Castillo, Harold Madrigal, Kelsy Moreno, ug Arianne Paz, nga tanan determinado nga makahatag og dungog sa Pilipinas.
Photo Courtesy: PNA
