Naangol ang upat ka indibidwal human nagbangga ang usa ka pedicab ug motorsiklo sa Purok Molave, Santol Street, Poblacion Uno, Bansalan, Davao del Sur, niadtong nakalabay nga adlaw.
Sa inisyal nga imbestigasyon, wala pa gipadayag sa mga otoridad ang tukmang hinungdan sa aksidente. Miresponde dayon ang mga personnel sa Municipal Disaster Risk Reduction and Management Office (MDRRMO) aron paghatag og unang tabang sa mga biktima.
Lakip sa mga naangol ang mga sakay sa pedicab nga sila Marvin Cabañero ug ang 6-anyos nga si Cassandra Cabañero, nga nakaangkon og gagmayng samad.
Samtang ang mga sakay sa motorsiklo nga sila Willie Esparaguera ug Arjay Cabca nakaangkon usab og mga samad sa nagkalain-laing bahin sa lawas ug gidala sa Viacrucis Medical Hospital alang sa dugang pagtambal.
Padayon ang imbestigasyon sa maong hitabo samtang gi-awhag sa mga awtoridad ang tanang motorista nga mag-amping kanunay sa pagbiyahe.
