Kapin P676.6 milyon nga kantidad sa mga iligal nga droga ang gisunog sa Philippine Drug Enforcement Agency Regional Office 7 (PDEA-7) atol sa drug destruction activity nga gipahigayon kagahapong adlawa, Hulyo 28. Ang kalihokan gipangulohan ni PDEA Director General Usec. Isagani R. Nerez, uban sa mga opisyal sa PDEA ug ubang mga ahensya sa gobyerno.
Mitambong usab si Cebu City Councilor Paul Labra III isip representante ni Cebu City Mayor Nestor D. Archival, chairman sa Regional Peace and Order Council 7 (RPOC-7).
Sumala sa ahensya, ang tanang ebidensya adunay pinal nga pagtugot gikan sa korte isip kabahin sa legal nga proseso ug aron mapugngan nga kini marecycle o mabalik sa iligal nga merkado.
Base sa rekord sa PDEA-7, ang kinatibuk-ang kantidad sa mga kontrabando miabot sa P676,659,213.84. Lakip sa mga gisunog ang 99.45 ka kilo sa shabu, 1.25 ka kilo sa marijuana, 1.29 ka kilo sa marijuana (gross weight), 8.4 mililitro sa nalbuphine, 18.18 ka gramo sa ephedrine, ug lainlaing expired nga mga tambal.
Matod sa PDEA-7, usa kini sa labing dako nga drug destruction activities nga ilang gipahigayon sukad pa sa 2017.
Photo courtesy: PNP Cebu Police Provincial Office
