Nagpadayon sa ikaduhang adlaw ang pagpahigayon sa Kadiwa ng Pangulo nga anaa nahimutang sa Capitol Grounds, Brgy. Estaka ning dakbayan nga nagsugod kagahapong adlawa Hulyo 28 hangtod karobng adlawa Hulyo 29, 2026.
Lakip sa mga mamahimong mapalit sa maong KNP ang mga presko nga mga prutas, utanon, bottled sardines, itlog, dried fish, ug uban pa. Una nang gikabutyag sa Provincial Agriculture nga ipahigayon ang Kadiwa ng Pangulo kaupat sa usa ka bulan.
Pinaagi sa KNP makapahigayon ang mga mag-uuma sa direktang pagbaligya sa ilang mga abot nga mga prutas ug utanon ug masuporta sa mga gagmayng negosyante.
Ang Kadiwa ng Pangulo usa ka programa nga direktang nagkonektar sa mga lokal nga mag-uuma ug mananagat ngadto sa mga konsumidor aron makahatag og barato nga pagkaon ug mapalig-on ang mga presyo. Pinaagi usab niini, mamahimong makadaginot ang mga konsumidor pinaagi sa direktang pagpalit sa mga produkto gikan sa mga mag-uuma.
