Padayon nga paningkamotan sa kagamhanang probinsyal sa Davao De Oro ang pagpalapad sa healthcare services sa mga provincial hospital aron mas daghang pasyente ang matabangan ug mahatagan og mas episyente ug tukmang pag-atiman.
Kini nga tinguha gipadayag ni Governor Raul “RM” Mabanglo uban sa iyang pagsalig nga magpadayon ang suporta sa iyang administrasyon sa pagkuha og pondo gikan sa Malacañang alang sa mga prayoridad nga proyekto sa mga hospital sa probinsya.
Lakip sa mga gitinguhang mapondohan ang pagtukod sa Outpatient Department (OPD) Building ug Emerging and Re-emerging Infectious Diseases (EREID) and Support Services Building sa DDOPH Montevista, ang Two-Storey Ward Building sa DDOPH Pantukan, ingon man ang paghatag og mga modernong kagamitan ug medical equipment sa mga provincial hospital.
Pinaagi sa maong mga proyekto, gilauman nga mas mapalapdan ang serbisyong panglawas dili lamang alang sa mga residente sa Davao de Oro, kondili usab sa mga pasyente gikan sa kasikbit nga mga probinsya sama sa Davao Oriental, Agusan del Sur, ug Davao del Norte.
Matod ni Dr. Ferdinand Soberano, Chief of Hospital sa DDOPH Montevista, dako ang natampo sa suporta sa national government aron matuman ang mga prayoridad nga panginahanglan ug mapalambo pa ang kalidad sa serbisyo sa mga provincial hospital sa probinsya.
Photo Courtesy:RHU Nabunturan
