Boluntaryong misurender ang usa ka indibidwal nga giilang si alyas “Aming,” 50-anyos, ulitawo, mananabas og tuba ug residente sa Barangay Lemon, Capoocan, Leyte niadtong nakalabay nga adlaw, pinaagi sa padayon nga kampanya batok sa ilegal nga droga sa Capoocan MPS ubos sa direktiba sa Leyte Police Provincial Office (LPPO).
Matud sa kapulisan, ang pagsurender gihimo sa boluntaryong paagi ug walay bisan unsang pagpugos, hulga o pagpamugos gikan sa mga awtoridad. Gipadayag usab sa maong indibidwal ang iyang tinguha nga magbag-o isip tubag sa padayon nga kampanya sa lokal nga panggamhanan ug sa kapulisan batok sa ilegal nga droga. Human sa pagsurender, mipirma siya sa Affidavit of Undertaking ug gipailalom sa hustong dokumentasyon subay sa mga pamaagi sa Philippine National Police (PNP).
Gipasiugda sa LPPO nga ang maong kalihokan nagpakita sa padayon nga paningkamot sa PNP sa pagdasig sa mga nalambigit sa ilegal nga droga nga mopili sa rehabilitasyon ug pagbag-o aron mahimong mapuslanong miyembro sa katilingban. Dugang pa sa kapulisan, magpadayon sila sa pagpatuman sa mga programa nga nagtutok sa paglikay sa krimen ug pagpalig-on sa kalinaw ug kahapsay sa komunidad.
Photo Courtesy: Capoocan MPS
