Arestado ang usa ka 22-anyos nga estudyante human kini masikop sa gikasang search warrant operation sa Purok 3, Barangay Pag-antayan, Cantilan, Surigao del Sur, niadtong nakaadlaw nga adlaw.
Giila ang suspek sa alyas nga “Cliff”, kinsa lumulupyo sa maong dapit, gipahigayon ang operasyon pasado alas-onse sa kadlawon (1:00 AM) sa mga personahe sa Cantilan Municipal Police Station (MPS) ubos sa pamunoan ni PCPT Jovie C. Alngog, Officer-in-Charge, inabagan sa Regional Intelligence Division – PRO 13 pinaagi sa Target Intelligence Packet (TIP).
Dala sa mga otoridad ang Search Warrant No. 2026-36 nga giisyu sa Presiding Judge sa Regional Trial Court (RTC), 11th Judicial Region sa Cantilan, batok sa suspek tungod sa pagsupak sa Republic Act 10591 kun ang Comprehensive Firearms and Ammunition Regulation Act.
Atol sa gihimong legal nga operasyon sa panimalay, narekober sa mga pulis ang usa (1) ka caliber .45 KG99 pistol nga adunay serial number 210473, usa (1) ka magasin ug siyam (9) ka buhi nga bala sa caliber .45, upat (4) ka heat-sealed transparent plastic sachets nga adunay sulod nga gitutohang shabu, nga nagtimbang og 8 gramos ug mibalor og Php 54,400.00, nagkadaiyang drug paraphernalia lakip ang usa ka digital weighing scale, duha ka improvised bamboo clips, usa ka disposable lighter, pitaka, ug usa ka laptop bag.
Human mapahibalo sa iyang katungod ubos sa konstitusyon, gidala si alyas “Cliff” uban ang mga ebidensya ngadto sa Cantilan MPS alang sa saktong dokumentasyon ug pagpasaka og tukmang kaso.
Photo courtesy: Cantilan Municipal Police Station
