Gipadayon sa Provincial Government of Cotabato ang pagpalig-on sa mga programa alang sa mental health, isip kabahin sa paningkamot sa administrasyon ni Governor Emmylou “Lala” J. Taliño-Mendoza sa pag-atiman sa panglawas sa pangisip sa mga Cotabateño.
Tumong niining programa ang paghatag og mas sayon nga access sa serbisyo alang sa mga nag-atubang og stress, kabalaka, ug uban pang mental health concerns.
Niadtong Hulyo 24, 2026, 74 ka mga residente sa Kabacan ang nakabenepisyo sa Mental Health Check-up and Awareness Activity nga gipahigayon sa Integrated Provincial Health Office (IPHO) ubos sa pagpanguna ni Provincial Health Officer Dr. Eva C. Rabaya.
Gawas sa libreng konsultasyon ug tambal, gihatagan usab og kahibalo ang mga benepisyaryo ug ilang mga pamilya aron mas masabtan ug maatiman ang mga isyu sa mental health.
Padayon sab nga ginapatuman ang maong programa pinaagi sa koordinasyon ni Program Coordinator Karen Jae G. Cabrillos, uban sa mga Rural Health Units ug sa IPHO Medical Team nga gilangkuban sa mga psychiatrist, psychometrician, physical therapist, ug registered nurses, aron mapalambo ang panglawas ug pangisip sa mga katawhan sa lalawigan.
Photo Courtesy: Provincial Government of Cotabato
