Gihingusgan ni Congresswoman Marlesa Hofer Hasim ang iyang padayong paningkamot sa pagduso sa mga proyekto nga makabenepisyo sa katawhan ug makatampo sa tinguha nga mahimong siyudad ang lungsod sa Ipil sa umaabot.
Matud ni Hasim, dili tungod kay siya anaa sa Ipil maong daghan ang mga proyekto sa lungsod, kondili tungod kay gusto niyang makita ang padayong kalamboan sa Ipil ug ang pag-abot sa panahon nga mahimo na kini nga siyudad.
Gibutyag usab sa kongresista nga isip magbabalaod, seryoso niyang gituman ang iyang oversight function, diin iyang ginasubay ang performance sa nagkalain-laing ahensya sa gobyerno sama sa DPWH, DepEd, CHED, DA, ug uban pa.
Matud pa niya, bukas ang iyang opisina sa tanang reklamo sa publiko aron matabangan sa pagpangita og solusyon pinaagi sa kooperasyon sa mga hingtungdan nga ahensya.
Imbis nga magsinabtanay pinaagi sa kasaba, iyang gipahinumdoman ang mga empleyado sa gobyerno sa ilang responsibilidad isip mga public servant, ilabina panahon sa baha ug uban pang kalamidad.
Gipasiugda usab ni Hasim nga ang prayoridad sa iyang opisina mao ang pagpatuman sa mga lig-on ug dekalidad nga proyekto nga mapuslan ug matagamtaman sa katawhan sulod sa dugayng panahon.
Photo Courtesy: wikipedia
