Nakadawat og emergency assistance gikan sa Department of Social Welfare and Development o DSWD ang 69 ka pamilya nga naapektuhan sa habagat o Southwest Monsoon sa lungsod sa Maitum, Sarangani Province.
Sa kinatibuk-an, 224 ka indibidwal ang nakabenepisyo sa gipang-apod-apod nga emergency kits ug pinansyal nga tabang aron makatabang kanila sa pagbangon human sa padayon nga pag-ulan ug mga thunderstorm nga dala sa habagat.
Base sa report, 41 ka pamilya gikan sa Barangay Kalaong ug 28 ka pamilya gikan sa Barangay Kalaneg ang nakadawat sa maong ayuda.
Nahimong posible ang relief distribution pinaagi sa panagtinabangay sa lokal nga kagamhanan sa Maitum ubos sa pagpanguna ni Mayor James Mark Reganit, Municipal Social Welfare and Development Office (MSWDO) ug sa DSWD.
Matod pa sa lokal nga kagamhanan, padayon silang nag-monitor sa kahimtang sa mga apektadong residente ug nakigtinabangay sa mga hingtungdan nga ahensya aron masiguro nga madugangan pa ang tabang kon gikinahanglan.
Nagpasalamat usab ang Municipal Government of Maitum sa DSWD, MSWDO, ug sa tanang partner agencies tungod sa ilang padayon nga suporta ug paghatag og paglaum sa mga pamilyang naapektuhan sa kalamidad.
Photo Courtesy: Municipality of Maitum
