Giklaro pag-usab ni Tagum City Traffic Management Unit (TMU) Head Francisco Sevilles Jr. nga walay pag-usab o pag- usbaw sa pletehan sa mga tricycle sa dakbayan sa Tagum, Davao del Norte.
Apan iyang gitin-aw nga mag depende usab kini kung adunay dagkung kausaban sa presyo sa petrolyo sa pangkalibutanong merkado diin makita usab kini sa taripa nga naka paskil sa mga tricycle nga naga biyahe sulod sa dakbayan.
Sumala ni Sevilles nga ang 20 pesos nga minimum sa pletehan, cover niini ang unang tulo ka kilometro gikan sa pag sakay sa pasahero, samtang adunay dugang nga 2 pesos alang sa matag usa ka kilometro nga pag biyahe.
Dugang pa sa TMU Head, nga kung adunay reklamo kalabot sa mga drayber nga mangayo pa og singil sa pletehan labaw sa minimum, o wala na misunod sa taripa, mamahimong mopadangat sa ilang reklamo ngadto sa buhatan sa TMU sa Purok Tipaz, Barangay Magugpo East, Tagum City, o moduol sa mga traffic enforcer nga naka assign sa mga designated areas sa dakbayan sa Tagum.
Samtang nag-awhag usab kini nga kung adunay nasinati nga pagpangabuso sa pletehan, e-deritso na lamang kini sa ilang buhatan ug dili sa social media ipadangat alang sa hustong pagproseso sa naasoy nga eregularidad.
