Mahimong maka-avail sa Safe Loan Program sa PAG-IBIG Fund ang mga aktibong miyembro bisan adunay existing Multi-Purpose o Salary Loan sa ahensya.
Matud ni Rey Joseph Lerias, Costumer Support Assistant sa PAG-IBIG Fund Pagadian, ang proseso sa pag-apply sa SAFE Loan susama gihapon sa Calamity ug Salary Loan diin kinahanglan ang miyembro dunay kontribusyon nga balig usa ka tuig gikan sa pagkamyembro.
Dugang pa, dili babag ang kasamtangang salary loan aron makapangayo og Safe Loan, basta makatuman ang miyembro sa mga kwalipikasyon ug kinahanglanong dokumento nga gipangayo sa programa.
Gidugang niya, matag miyembro mamahimog maka-avail sa maximum amount nga P10,000 apan kon wala pa maakabot sa 10,000 ang savings sa miyembro anaa ra sa less than P10,000 iyang ma-avail nga SAFE loan.
Gidasig usab ni Lerias ang tanang miyembro nga anaa sa Zamboanga del Sur nga moduol sa ilang opisina aron masayran ang mga pamaagi sa pag-avail sa Safe Loan Program.
