Tula ka indibidwal, ang angol lakip ang usa ka 5-anyos nga bata, human nagbangga ang duha ka motorsiklo sa Mabini Street ug Abad Santos Street sa Barangay Madasigon, Molave, Zamboanga del Sur, alas-7:05 sa buntag adlawng Miyerkules, Hulyo 15, 2026.
Base sa inisyal nga imbestigasyon sa Molave Municipal Police Station, ang 20-anyos nga estudyante nga nagmaneho sa Honda Beat misulay og liko pawala paingon sa Abad Santos Street apan nabanggaan sa kasugat nga Yamaha Mio Soul I nga gimaneho sa 24-anyos nga babaye.
Tungod sa kusog nga impact, nalabay ang driver ug angkas nga 5-anyos sa Honda Beat paingon sa concrete pavement hinungdan sa pagka-angkon nila og mga samad sa nagkalain-laing bahin sa lawas.
Gidala dayon sila sa mga personnel sa Municipal Disaster Risk Reduction and Management Office (MDRRMO) ngadto sa ospital aron matambalan.
Human sa hitabo, ang duha ka motorsiklo gikustudiya sa Molave Municipal Police Station alang sa dokumentasyon, samtang nagpadayon pa ang imbestigasyon sa maong insidente.
Photo Courtesy: ZSPPO
