Kapin sa P6.9 million nga kantidad sa giingong smuggled nga sigarilyo ang nabawi sa mga otoridad atol sa hiniusang operasyon sa usa ka bakanteng lote sa Zone 7, Barangay Muricay, Pagadian City, pasado alas-1:30 sa kaadlawon Hulyo 16, 2026.
Gilusad ang operasyon sa pagpanguna sa Pagadian City Police Station uban ang nagkadaiyang law enforcement ug military units, human makadawat og impormasyon bahin sa giingong gipangbiyaan nga kontrabando sa maong lugar.
Nadiskubrehan sa mga operatiba ang 40 ka master cases sa nagkalain-laing brand sa sigarilyo ug 240 ka reams nga gituohang smuggled diin ang inventory gihimo uban sa presensya sa Bureau of Customs (BOC) Pagadian ug mga barangay officials.
Base sa initial evaluation sa Bureau of Customs, gibana-bana nga adunay kinatibuk-ang kantidad nga P6, 908, 000.00 ang mga nabawi nga smuggled nga mga sigarilyo. Gidala na ang mga ebidensya sa Pagadian City Police Station alang sa dokumentasyon ug husto nga pagtipig.
Samtang nagpadayon ang imbestigasyon aron mailhan ang tag-iya nga nagbilin sa maong mga kontrabando ug aron usab masuta ang gigikanan sa giingong smuggled nga mga sigarilyo.
Photo Courtesy: ZSPPO
