BRITISH NATIONAL, SIKOP TUNGOD SA KASONG VAWC

Nagtingkagol karon sa selda sa prisohan ang usa ka lungsuranong Briton nga giilang si alyas “Joe” 45-anyos ulitawo, ug temporaryong nagpuyo sa San Joaquin St., Poblacion District 4, Burauen, Leyte, human kini madakpi sa mga otoridad tungod sa kasong VAWC didto sa lungsod sa Burauen, Leyte, kagahapong adlawa, Hulyo 15, 2026.

Ang suspek gidakop pinaagi sa usa ka Warrant of Arrest nga giisyu niadtong Hulyo 14, 2026. Tungod sa kasong paglapas sa Section 5(i) nga may kalabutan sa Section 6(f) sa Republic Act No. 9262 kon “Anti-Violence Against Women and Their Children Act” diin adunay girekomendang piyansa nga nagkantidad og ₱72,000.00 alang sa iyang temporaryong kagawasan.

Sa wala pa gidala ang akusado sa buhatan sa La Paz MPS, gipasabot una kaniya ang rason sa iyang pagkasikop ug gibasahan sa iyang mga katungod ubos sa Batakang Balaod (Constitutional Rights) gamit ang pinulongan nga iyang nasabtan. Kasamtangan siyang gipailawom sa dokumentasyon alang sa saktong disposisyon sa dili pa i-turnover ngadto sa korte nga nag-isyu sa warrant.