Mokabat na sa 909 ka pamilya o 2,861 ka indibidwal gikan sa 14 ka barangay sa Davao Region ang naapektuhan sa padayon nga pag-ulan tungod sa Habagat, sumala sa DSWD Field Office XI.
Sa maong ihap, 179 ka pamilya ang temporaryong nagpabilin sa siyam ka evacuation centers. Pinakadako ang epekto sa Jose Abad Santos, Davao Occidental, diin 525 ka pamilya ang naapektuhan, 54 ka balay ang hingpit nga naguba, ug 1,200 ka family food packs ang gipanghatag sa DSWD.
Sa tibuok rehiyon, 69 ka balay ang totally damaged. Sa Barangay Tanuman, Jose Abad Santos, upat ka tawo ang namatay, usa ang nasamdan, ug lima pa ang gikatahong missing tungod sa grabeng pag-ulan.
Samtang, naghatag na ang DSWD XI og ₱20,000 Cash Relief Assistance sa matag pamilya sa mga namatyan ug nagpadayon ang koordinasyon sa mga lokal nga panggamhanan aron mapadali ang paghatod sa ayuda sa tanang naapektuhan.
