Nakahatag og dako nga pagtagad sa komunidad ug daling nag-viral sa social media ang talagsaon nga kasal sa duha ka miyembro sa LGBTQ+ community nga gipahigayon sa Saint James the Greater Parish sa Dapitan City.
Ang magtiayon nga sila si Ronnie ug Tisha Marie Enderez nagpakita og lahi nga konsepto sa ilang seremonya diin si Ronnie (usa ka binabaye) ang nagsul-ob og wedding gown isip “bride,” samtang si Tisha (usa ka lesbian) ang nagsul-ob og Barong Tagalog isip “groom.”
Atol sa seremonya, pormal nga gipahigayon sa pari ang kasal diin napanumpaan sa magtiayon ang ilang tiunay nga gugma ug saad nga magpabilin silang matinud-anon sa usag usa hangtod sa katapusan sa ilang kinabuhi, taliwala sa bisan unsang mga pagsulay ug paghukom sa katilingban.
Tungod sa maong talagsaon nga porma sa seremonya, nagkalain-laing reaksyon ang nakuha niini gikan sa mga netizens kinsa mipaabot sa ilang suporta ug pagdayeg sa mensahe sa gugma, pagdawat, ug kaisog sa magtiayon
Photo Courtesy: Tisha Marie Amal Enderez / Facebook
