Kapin sa P9,000,000.00 nga kantidad sa mga smuggled nga sigarilyo ang nasakmit sa Zamboanga del Sur Police Provincial Office (ZSPPO) sa duha ka managlahing operasyon sa Pagadian City ug Tukuran Zamboanga del Sur ning bag-o.
Sa unang operasyon alas 12:33 sa kaadlawon sa Hulyo 12, nadakpan sa checkpoint sa Barangay Tiguma, Pagadian City ang usa ka gray nga Toyota Vios nga gidudahang nagkarga og smuggled cigarettes gikan sa Lanao del Sur.
Napakyas sa pagpakita ang driver sa gikinahanglang dokumento hinungdan gikumpiska sa mga otoridad ang 251 ka reams sa News Berlin Cigarettes nga nagkantidad ug P1.28 million gikan sa pagpanag-iya sa driver nga usa ka aktibong miyembro sa Philippine National Police nga naka-assign sa Camp Crame.
Samtang niananv alas 2:25 sa kaadlawon sa Hulyo 13, laing operasyon ang gipahigayon sa Barangay Panduma, Tukuran diin nasakmit ang 49 ka master cases sa iligal nga sigarilyo nga nagkantidad og kapin P7.73 million.
Pakyas usab nga nakapresentar ang 52-anyos nga driver alang sa gikinahanglang dokumento alang sa iyang karga hinungdan siya nga gisikop, nga sa kinatibuk-an niabot sa P9.02 million ang kantidad sa mga nakumpiskang mga sigarilyo.
Matud ni Provincial Director PCOL Bonifacio B. Arañas Jr., padayon ug walay pili ang kampanya sa ZSPPO batok sa smuggling ug uban pang matang sa kriminalidad, ug si bisan kinsa nga makalapas sa balaod, pagapanubagon gyud.
Photo Courtesy: ZSPPO
