Nag-atubang og kaso ang TV host ug kanhi chief sa Overseas Workers Welfare Administration (OWWA) nga si Arnaldo “Arnell” Ignacio nga Usurpation of Official Functions (pagpangangkon o paggamit sa katungdanan nga walay awtoridad) human nagpasaka og kaso batok kaniya ang Office of the Ombudsman kalabot sa kontrobersyal nga pagpalit sa ahensya og mga propiedad nga nagkantidad og ₱1.4 bilyones.
Sa usa ka pahayag niadtong Sabado, Hulyo 11, si Department of Migrant Workers (DMW) Secretary Hans Leo Cacdac nagbutyag nga nadawat sa iyang buhatan ang resolusyon sa Ombudsman nga gipetsahan og Hunyo 19, 2026 niadtong Hulyo 7. Nagkanayon ang resolusyon nga nakita sa Ombudsman nga gipirmahan ni Ignacio ang kontrata sa pagbaligya (contract to sell), ang deed of absolute sale, ug ang may kalabotan nga addendum alang sa maong transaksyon.
Giingong gi-aprobahan usab niya ang pagpagawas sa pondo sa gobyerno nga walay pagtugot gikan sa OWWA Board of Trustees. Matod ni Cacdac, kini ang nahimong basehan sa rekomendasyon sa Ombudsman nga pasakaan siya og kaso tungod sa paglapas sa Article 177 sa Revised Penal Code, o ang usurpation of official functions. Nag-ingon ang desisyon sa Ombudsman nga milihok si Ignacio nga daw aduna siyay awtoridad gikan sa OWWA Board, bisan pa man nga nasayod siya nga wala siyay ingon niana nga gahom.
Sumala kanila, dili lang kini yanong paglapas sa mga pamaaging administratibo kondili usa ka kriminal nga salaod. Dugang pa nga gipasabot sa DMW nga ang kapakyas sa pagkuha og pag-uyon gikan sa Board of Trustees dili lamang usa ka teknikal nga kasaypanan; matod nila, ang maong lakang nakalapas sa mga mekanismo sa transparency ug pagdumala nga gimando sa OWWA Charter, ug si Ignacio giingong mihimo og mga aksyon nga labaw pa sa iyang legal nga awtoridad.
Gipunting ni Cacdac nga ang kasong usurpation of official functions (o ang pag-angkon sa katungdanan o gahom nga dili iya) adunay silot nga pagkabilanggo gikan sa unom ka bulan hangtod sa upat ka tuig. Gimando usab sa Ombudsman ang pagpasaka sa tukmang pormal nga mga kaso batok kang Ignacio sa angay nga korte.
Kahinumdoman nga gikuha si Ignacio isip OWWA Administrator niadtong Mayo 2025 tungod sa giingong pagkawala sa pagsalig sa gobyerno kaniya, human sa mga kontrobersiya nga naglibot sa nahisgutang kasabotan sa pagpalit og yuta nga gikatahong walay pag-uyon gikan sa OWWA Board of Trustees. Samtang, ang kampo ni Ignacio wala pa nagpagawas og reaksyon, tubag, o pahayag bahin niining maong butang.
Photo Courtesy: Arnel Iganacio fb
