Nagpahigayon og road inspection ug clearing operation ang mga kapulisan sa Maitum Municipal Police Station, kauban ang mga personahe sa Barangay Engineering Office, Municipal Disaster Risk Reduction and Management Office (MDRRMO), ug mga opisyal sa Barangay New La Union, Maitum, Sarangani Province, niadtong Hulyo 9.
Ang kalihokan gipangunahan ni Police Major Ramil B. Aruelo, Chief of Police sa Maitum Municipal Police Station, ubos sa pagdumala ni Police Colonel Jerone Orville O. Panganiban, Provincial Director sa Sarangani Police Provincial Office.
Tumong sa operasyon ang pag-inspeksyon sa kahimtang sa dalan ug paghinlo sa mga debris ug uban pang sagabal nga nahabilin human sa pagbaha sa dapit duol sa Lucena Resort sa Barangay New La Union, aron masiguro ang kaluwasan sa mga motorista ug mga molabay.
Sumala sa pinakabag-ong assessment, maagian pa sa pagkakaron ang maong dalan apan alang lamang sa mga motorsiklo. Gitambagan usab ang mga drayber sa mga four-wheel vehicles ug uban pang dagkong sakyanan nga likayan una ang maong ruta hangtod nga hingpit nang maayo ang dalan ug ideklarang luwas kini alang sa tanang klase sa sakyanan.
Padayon usab nga giawhag sa mga awtoridad ang publiko nga magmatngon tungod sa nagpadayon nga pag-ulan, mosunod sa mga traffic advisory, ug unahon kanunay ang kaluwasan sa tanang higayon.
Photo Courtesy:MAITUM MPS
